वीपीको स्मृतिमा भएको कविता प्रतियोगितामा खोटाङका नवराज प्रथम

विराटनगर । जननायक वीपी कोइरालाको ४२ औं स्मृति दिवसका अवसरमा नेपाली कांग्रेस मोरङले खुल्ला कविता प्रतियोगिता आयोजना गरेको छ । मोरङ क्षेत्र नम्बर २ को व्यवस्थापनमा मोरङको डाइनियामा आइतबार भएको कविता प्रतियोगितामा खोटाङका कवि नवराज खड्का प्रथम भएका हुन् ।

‘एक विचलित आत्मा’ शीर्षकको कविता वाचन गरेर खड्का प्रथम भए । त्यस्तै ‘स्वदेश भूमिभित्र नै’ शीर्षकको कविता वाचन गरेर मोरङको रंगेलीका कवि चिरञ्जीवि काफ्लेले द्वितीय पुरस्कार प्राप्त गरे । मोरङको कानेपोखरीका कवि सुशील राईले ‘तिमी र तिम्रो नेता’ शीर्षकको कविता प्रस्तुत गरेर प्रतियोगिताको तृतीय स्थान प्राप्न गर्न सफल भए ।

कवि एवं पत्रकार मीनकुमार नवोदित र साहित्यकार भरत गुरागाईं ‘बर्बरिक’ निर्णायक रहेको प्रतियोगितामा सन्तोष बाँस्तोला, पारस मण्डल, फडिन्द्र गड्तौला र सुरदेशकुमार दासले पुरस्कार प्राप्त गरेका थिए । बाँस्तोलाले ‘युगपुरुष तिम्रो सम्झना’, मण्डलले ‘वीपी कोइराला तिमी महान्’, गड्तौलाले ‘वीपीवादः लोकतान्त्रिक समाजवाद’ र दासले ‘वीपी कोइरालाको श्रद्धाञ्जली’ शीर्षकको कविता प्रस्तुत गरेका थिए ।

प्रथम, द्वितीय, तृतीय र सन्त्वना हुने कविहरूलाई क्रमशः ५ हजार १ सय, ३ हजार १ सय, २ हजार १ सय र १ हजार १ सय प्रदान गरिएको थियो । आयोजकले वीपी कोइरालाका विषयमा केन्द्रित भएर लेखिएका कविता प्रतियोगितामा समावेश गराएको थियो । 

कार्यक्रमका प्रमुख अतिथिसमेत रहेका नेपाली कांग्रेस मोरङका नेता गोपालमानसिंह राजभण्डारी, मोरङ कांग्रेसका कार्यबाहक सभापति भक्तिनाथ माझी, सचिव मोदराज घिमिरे, नेपाल प्रेस युनियन कोशी प्रदेशका अध्यक्षसमेत रहेका निर्णायक मीनकुमार नवोदित, युवा नेता सुयर्माराज राई, कार्यक्रम संयोजक वीरेन्द्रकुमार साहलगायतले पुरस्कार र प्रमाणपत्र प्रदान गरे ।