बैजनी भेट : सिजन श्रेष्ठ

सम्झना पनि बैजनी हुन्छ
तिमीलाई सम्झिँदा ।

अझै याद छ–
अन्तिम पटकको भेटमा
बैजनी रङको कपडामा
सजिएर आएकी थियौ तिमी ।

सम्झनाको आँगनीमा समेत
यदाकदा भेटिने गर्दछ्यौ तिमी अचेल
तिमी भेटिँदा तर
केशरको फूल झैं बैजनी रङमा फुल्दछ
लगभग रङ्गहीन भइसकेको मेरो मन पनि ।

तिमी भेटिँदा
बैजनी हुन्छ– तिमी र म हिँड्दै गरेको बाटो
बैजनी हुन्छ– तिमी र मैले छुँदै हिँडेको माटो
बैजनी हुन्छ–तिमी र मैले सँगसँगै तरिहिँडेको नदीको पानी
बैजनी हुन्छ– तिमी र मलाई सँगै छुन दौडिहिँडेको प्रकाश…

भेट त भेटै हो आखिर
सम्झनामै किन नहोस् !

उही समय र उस्तै परिवेश
तर फरक फरक ठाउँमा उभिएर
हामीले हेर्दै गरेको आकाशको नीलो रङ पनि
एकाएक बैजनी हुन्छ
तिमीसँगको भेटमा त !

वाना, सङ्खुवासभा