प्रथम नेपाल हब महिला २०–२० क्रिकेटमा विराटनगर विजयी

विराटनगर । नेपाल क्रिकेट फाउण्डेशनको आयोजनामा तथा क्रिकेट विथ बाउन्ड्रीको सहयोगमा भएको प्रथम नेपाल हब महिला २०–२० क्रिकेट प्रतियोगितामा विराटनगर विजयी भएको छ। विराटनगर हब महिला टिम र राजविराज हब महिला टिमबीच तीन खेलको २०–२० क्रिकेटमा विराटनगरले २–० को अग्रता लिएको छ। अन्तिम खेल सोमबार हुने खेल संयोजक मन्दिप साहले जानकारी दिए।

आइतबार विराटनगरको मर्लिबोन ज्वाला क्रिकेट मैदानमा भएको दोस्रो खेलमा विराटनगरले राजविराजलाई ७० रनले पराजित गरी तीन खेलको सिरिजमा २–० को अग्रता लिएको हो। टस हारेर ब्याटिङ गरेको विराटनगरले निर्धारित २० ओभरको खेलमा १९ दशमलव ४ बलमा सबै विकेट गुमाएर ११२ रन बनाएको थियो। विराटनगरका लागि प्रिन्सा मगरले २८ रन बनाउँदा काजल राजवंशीले २० रन, टिका साहले १६ रन र सानु राजवंशीले १२ रनको योगदान दिइन्। राजविराजकी अपेक्षा यादवले ३ विकेट लिँदा साक्षी यादवले पनि ३ विकेट लिइन्।

१ सय १३ रनको विजयी लक्ष्य पाएको राजविराजले ९ दशमलव ५ बलमा सबै विकेट गुमाएर ४२ रनमै सीमित भयो। राजविराजले अतिरिक्त २४ रन बाहेक कुनै पनि ब्याटरले दोहोरो अंकलाई छु्न सकेनन्। विराटनगरकी प्लेयर अफ द म्याच टिका साहले ४ विकेट लिइन्। उनले १ दशमलव ५ बलमा २ रनमात्र दिएकी थिइन्। त्यस्तै सुवेक्षा लिम्बुले २ विकेट लिइन्।