बेलायतका राजा चार्ल्स भारतको बेंगलुरुमा

काठमाडौँ । बेलायतका राजा चार्ल्स व्यक्तिगत भ्रमणमा भारतमा रहेका छन् । भारतीय समाचार एजेन्सी पीटीआईका अनुसार उनी आफ्नी पत्नी रानी क्यामिलासँग बेंगलुरुको ह्वाइटफिल्ड नजिकैको मेडिकल सुविधा ‘होलिस्टिक हेल्थ सेन्टर’ मा बसिरहेका छन् । गत वर्ष मे ६ मा बेलायतका राजाको राज्याभिषेकपछि चार्ल्स पहिलो पटक बेंगलुरु आएका हुन् ।

तीन दिने भ्रमणमा राजा चार्ल्सले योग, ध्यान सत्र र थेरापी लिइरहेको मिडिया रिपोर्टमा बताइएको छ । चार्ल्स र क्यामिलाले पनि ३० एकडमा रहेको मेडिकल सुविधा र लामो पैदल यात्राको अर्गानिक फार्ममा बसिरहेका छन् । चार्ल्सको उपचारका लागि केन्द्रमा विशेष टोली तयार गरिएको छ ।

यो अवधिमा उनले विशेष डाइट पनि फलो गरेका छन् । सत्र सकिएपछि दुवै लण्डन फर्कने बताइएको छ । राजा चार्ल्स बेंगलुरुको यो स्वास्थ्य सेवा केन्द्रमा पुगेको यो पहिलो पटक होइन । यसअघि २०१९ मा उनले आफ्नो ७१औं जन्मदिन पनि यहाँ मनाएका थिए ।

चार्ल्सले हालसम्म कुल ९ पटक बेंगलुरुको स्वास्थ्य केन्द्रको भ्रमण गरिसकेका छन् । बैंगलोरमा मेडिकल सुविधा सञ्चालन गर्ने डा. आइज्याक मथाईलाई पनि राजा चार्ल्सको राज्याभिषेकमा निमन्त्रणा गरिएको थियो । उनी बाहेक उनका भाइ र बेलायतका राजकुमार एन्ड्र्युले पनि भारतीय योगीबाट उपचार गराइसकेका छन् ।

बेलायती अखबार ‘द सन’का अनुसार भारतीय योगीले एन्ड्रयूलाई धेरै वर्षसम्म मन्त्र, मसाज र ध्यानको माध्यमबाट थेरापी दिएका थिए । यसपछि सन् २०२२ मा एन्ड्रयुले राजा चार्ल्सलाई ३२ लाख रुपैया योगीको शुल्क तिर्नको लागि बिल पठाए तर उनले त्यो रकम तिर्न अस्वीकार गरेका थिए । चार्ल्स राजा नभएसम्म रानी एलिजाबेथले एन्ड्रयूको लागि यो बिल तिर्ने गरेको बताइएको छ ।