बस्ती छिरेको हात्ती धपाउन जाँदा ५० वर्षीय पुरुषकाे मृत्यु

कञ्चनपुर । कञ्चनपुरमा जंगली हात्तीको आक्रमणबाट एक जनाको मृत्यु भएको छ।लालझाडी गाउँपालिका-४ डाडाजाइँका ५० वर्षीय रामदल रानाको हात्तीको आक्रमणबाट मृत्यु भएको हो।

जिल्ला प्रहरी कार्यालय कञ्चनपुरका डीएसपी उमेश जोशीका अनुसार बस्ती पसेको जंगली हात्तीको बथान धपाउन गएका रानामाथि हात्तीले आक्रमण गरेको थियो।

शनिबार बेलुका बस्तीमा हात्ती आएका थिए। हात्ती धपाउन गएका राना बेपत्ता भएपछि स्थानीयले प्रहरीलाई खबर गरेका थिए। खोजी गर्दा आइतबार बिहान घरबाट करिब एक किलोमिटरको दूरीमा शव भेटिएको प्रहरीले जनाएको छ।