बिराटनगर ग्याङ फाइट प्रकरण : युवतीलाइ सिठि बजाएर जिस्काएपछि युवककाे हत्या

इटहरी । मोरङको विराटनगरमा सोमबार राति युवाको दुई ग्याङ (समूह) बीचको झडप हुँदा एक २१ वर्षीय युवकको ज्यान गएको छ । युवकको हत्या आरोपमा प्रहरीले एक नाबालकसहित चार जनालाई पक्राउ गरेको छ ।

विराटनगर महानगरपालिका–२, नेपाल टेलिकम नजिकै भएको दुई समूहबीचको झडपमा कटहरी गाउँपालिका–१, जमटोकीका करण कामतको हत्या भएको हो । मोरङ प्रहरीका प्रवक्ता डिएसपी ज्ञानेन्द्रबहादुर बस्नेतका अनुसार सोमबार राति १० बजेतिर अघिल्लो दिनको सामान्य विवादले ग्याङ फाइटको रूप लिएको थियो । जसमा कामतको ज्यान गएको हो ।

भिडन्तमा कामतको छाती र कम्मरमा कैंचीले गहिरो चोट लागेका थियो । लगतै उनलाई उपचारका लागि विराटनगरको कोशी अस्पताल पुर्‍याइएको थियो । डिएसपी बस्नेतले भने, ‘कोशी अस्पतालमा उपचारका लागि लगिए पनि थप उपचारका लागि नोबेल लगिएको थियो ।’ उपचारकै क्रममा उनको मृत्यु भएको डिएसपी बस्नेतले जानकारी दिए । प्रारम्भिक अनुसन्धानबाट युवती जिस्क्याएको विषयमा दुई समूहबीच विवाद भएको खुलेको छ । घटना भएको अघिल्लो दिन युवती जिस्क्याएको विषयमा विवाद भएको खुलेको प्रहरीले जनाएको छ ।

घटनामा गम्भीर घाइते भएका कामतका साथी विक्रम मण्डल र अमन राय पनि अस्पतालमा उपचाररत छन् । रायको अवस्था गम्भीर रहेको छ भने मण्डलको अवस्था मध्यम छ । घटनामा संलग्न भएको आरोपमा विराटनगर–११ घर भई विराटनगर–२ स्थित विराट नर्सिङ होमअगाडि डेरा गरेर बस्दै आएका सोनु गिरी, ताप्लेजुङको दोखु घर भई नर्सिङ होमअगाडि डेरा बस्दै आएका सन्तोष भनिने निमदावा शेर्पा, भोजपुरको भुल्के घर भई नर्सिङ होमअगाडि डेरा बस्दै आएका सञ्जय पुरी र मोरङको रंगेली घर भई विराटनगर–२ स्थित शनीहाटमा डेरा बस्दै आएका १६ वर्षीय बालकलाई पक्राउ गरिएको छ ।

घटनामा प्रयोग गरिएको कैंची विराट नर्सिङ होमअगाडिको गोलबजार फार्मेसीबाट बरामद भएको प्रहरीले जनाएको छ । शेर्पा र पुरी नर्सिङ होमअगाडिको फार्मेसीमा काम गर्थे । घटनामा संलग्नलाई उनीहरु बस्दै आएको स्थानबाट मंगलबार बिहान पक्राउ गरिएको हो । प्रहरीका अनुसार, विवादपछि रिसइबी साँधेर बसेको मृतक र घाइते पक्षका १२–१३ जनाको समूहले बाटो ढुकेर पीडक पक्षका युवाहरुलाई सुरुमा आक्रमण गरेको पाइएको छ । पीडक पक्षका युवाहरुले पनि काम सकेर घुम्न निस्किएका बेला आफूहरुमाथि बाटो ढुकेर बसेको समूहले सुरुमा आक्रमण गरेको प्रहरीलाई बताएका छन् ।

‘ग्याङ फाइट’ का क्रममा दोहोरो हानाहान हुँदा शेर्पाले साथमा बोकेको कैंची निकालेर अर्को पक्षका युवाहरुलाई जथाभावी प्रहार गरेको प्रहरीले जनाएको छ । घटनास्थलमा फेला परेको मोबाइलको आधारमा घटनामा संलग्नलाई पक्राउ गर्न सफल भएको डिएसपी बस्नेतले बताए। उनले भने, ’घटनाका सम्बन्धमा थप अनुसन्धान सुरु गरिएको छ र घटनामा संलग्नविरुद्ध कर्तव्य ज्यान मुद्दा चलाउने तयारी भइरहेको छ।’