झापामा कुकुरसँग मोटरसाइकल ठोक्किएर दुर्घटना हुँदा एकको मृत्यु, एक घाइते

झापा । झापाको कमल गाउँपालिकामा कुकुरसँग ठोक्किएर मोटरसाइकल दुर्घटना हुँदा एक जनाको ज्यान गएको छ भने एक जना घाइते भएका छन् ।

जिल्ला प्रहरी कार्यालय झापाका अनुसार केर्खाबाट दमक आँउदै गरेको प्र.१–०१–०१४ प ८९१४ नम्बरको मोटरसाइकलले शुक्रवार बेलुका कमल गाउँपालिका– ५ सावित्र चोकमा बाटो काट्दै गरेको कुकुरसँग ठक्कर खाएर दुर्घटना हुँदा दुई जना घाइते भएका थिए ।

घाइतेमध्ये मोटरसाइकल पछाडि सवार शिवसताक्षी–२ का ४० वर्षीय नवीन आचार्यको शनिवार साढे ४ बजे उपचारका क्रममा ज्यान गएको जिल्ला प्रहरी कार्यालय झापाका प्रवक्ता कृष्णकुमार चन्दले जानकारी दिए । आचार्यको बीएण्डसी अस्पताल बिर्तामोडमा उपचार भइरहेको थियो । अर्का घाइते सोही ठाउँका मोटरसाइकल चालक २६ वर्षीय पदमबहादुर पौडेलको दमकस्थित निम्स अस्पतालमा उपचार भइरहेको छ ।