आजकाे माैसम : काेशीकाे पहाडी भेगमा बिहानै देखि वर्षा , २४ घण्टामा कहा कति पर्याे पानी ?

इटहरी । अहिले कोशी, मधेस, बागमती र गण्डकी प्रदेशका अधिकांश भू–भागमा र लुम्बिनी प्रदेशका पूर्वी भू–भागमा मनसुनी प्रणालीको प्रभाव रहेको मौसमविदले जनाएका छन् । बाँकी भू–भागमा स्थानीय वायु र पश्चिमी वायुको आंशिक प्रभाव रहेको छ ।

मौसम पूर्वानुमान महाशाखाका अनुसार आज (सोमबार) देशभर आंशिकदेखि साधारणतया बदली रहने छ । कोशी, बागमती, गण्डकी र लुम्बिनी प्रदेशका केही स्थानहरूका साथै मधेस, कर्णाली र सुदूरपश्चिम प्रदेशका थोरै स्थानहरूमा मेघगर्जनर चट्याङसहित हल्कादेखि मध्यम वर्षाको सम्भावना रहेको छ । साथै कोशी र गण्डकी प्रदेशका पहाडी भूभागका एक–दुई स्थानमा भारी वर्षाको पनि सम्भावना रहेको छ ।

भारी वर्षा हुने क्षेत्रमा हुन सक्ने गेग्रान बहाव, बाढी, पहिरो तथा भू–क्षयका जस्ता प्रकोपको जोखिम वा क्षतिबाट बच्न तथा यसबाट ती क्षेत्रहरूमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक असर पर्ने सम्भावना रहेकोले आवश्यक सतर्कता अपनाउन अनुरोध छ ।

भोलि (मंगलबार) देशभर आंशिकदेखि साधारणतया बदली रहने छ । कोशी, मधेस, बागमती र गण्डकी प्रदेशका केही स्थानहरूका साथै लुम्बिनी, कर्णाली र सुदूरपश्चिम प्रदेशका थोरै स्थानहरूमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ । साथै कोशी र बाग्मती प्रदेशका एक–दुई स्थानमा भारी वर्षाको पनि सम्भावना रहेको छ ।

पछिल्लो २४ घण्टामा कहाँ कति पर्‍यो पानी ?

मौसम पूर्वानुमान महाशाखाका अनुसार अहिले सुदूरपश्चिम, कर्णाली, गण्डकी, बागमती, मधेस, कोशी लगायत प्रदेशका केही स्थानमा वर्षा भइरहेको छ ।

सर्लाहीको मनुस्मारामा पछिल्लो एक घण्टामा २१.२ मिलिमिटर वर्षा भएको छ । कास्कीको लामा पाटनमा ९.२ मिलिमिटर वर्षा भएको छ । पछिल्लो २४ घण्टामा गोरखाको आरूघाटमा ५२ मिलिमिटर वर्षा भएको छ । सिन्धुपाल्चोकको घुमथाङमा ४८.८, बाहुनेपाटीमा ४७.६, दुबाचौरमा ४७.४ तार्केघ्याङमा ४८ मिलमिटर पानी परेको छ । काठमाडौंको धापमा २७.६ मिलमिटर पानी परेको छ । रोल्पाको लिबाङमा ४२.२, दाङको घोराहीमा ४०.४ मिलमिटर पानी परेको छ ।