भक्तपुरका गोपाल ढकाल हत्या प्रकरण : सन्तोष सुवालले मृतककी पत्नीसँग मागेका थिए २ लाख फिरौती

काठमाडाैं ।  यही फागुन ११ गते भक्तपुरमा भएको एउटा हत्याको घटनामा संलग्न भएको आरोपमा प्रहरीले भक्तपुरकै एक युवकलाई पक्राउ गरेर सार्वजनिक गरेको छ। तेह्रथुमको छथर गाउँपालिका- २ घर भइ भक्तपुरको सूर्यविनायक नगरपालिका- ८ सिपाडोलमा डेरा गरेर बस्ने ३३ वर्षीय ३३  गोपाल ढकालको हत्या भएको थियो। 

ढकालको हत्यामा संलग्न भएको आरोपमा प्रहरीले भक्तपुरकै चाँगुनारायण नगरपालिका- ६ घर भएका २९ वर्षीय सन्तोष सुवाललाई पक्राउ गरिएको काठमाडौँ उपत्यका अपराध अनुसन्धान कार्यालयका प्रवक्ता प्रहरी उपरीक्षक रविन्द्र रेग्मीले जानकारी दिए।हत्यापछि फरार रहेका सुवाल शनिबार काभ्रेको मण्डन देउपुर नगरपालिका- ६ बाट पक्राउ परेका हुन्।  

प्रहरी उपरीक्षक रेग्मीकाअनुसार ढकाल यही फागुन १० गते हराएका थिए। ढकाल हराएपछि अपरिचित व्यक्तिले उनकी पत्नी रेनु ढकाललाई फोन गरेर ‘श्रीमान चाहिए सूर्यविनायक जंगलमा दुई लाख रुपैयाँ लिएर आउन’ भनेका थिए। आफ्नो मोवाइलमा त्यस्तो फोन आएपछि श्रीमती ढकालले प्रहरीलाई जानकारी गराएकी थिइन्।

 त्यसको भोलिपल्ट सूर्यबिनायक नगरपालिका- ८ स्थित रोधग्न बस्नेतको गोठमा ढकाले मृत फेला परेका थिए। ‘उक्त घटनापछि सुवाल फरार थिए,’ रेग्मीले भने, ‘खोजी गर्ने क्रममा उनलाई काभ्रेको देउपुरबाट मृतकको मोवाइलसहित पक्राउ गरेका हौँ, घटनाको सम्बन्धमा थप अनुसन्धान जारी छ।’