कोशी प्रदेशका सभामुख विष्ट भन्छन्, ‘सबै दलहरूसँग समन्वय गरेर काम गर्छु’

इटहरी ।  कोशी प्रदेशका नव निर्वाचित सभामुख अम्बरबहादुर विष्टले सबै दलसँग समन्वय गरेर काम गर्ने बताएका छन् ।राप्रपाका प्रदेशसभा सदस्य विष्ट मंगलबार सभामुखमा निर्विरोध निर्वाचित भएका हुन् ।त्यसलगतै सञ्चारकर्मीहरुसँग कुरा गर्दै सभामुख विष्टले भने, ‘सबै दलका नेताहरुसँग समन्वय गरेर प्रदेशलाई अगाडि बढाउँछु ।’

पार्टीले प्रदेश खारेजीको माग राखेको छ, तपाईँ चाहिँ सभामुख हुनुभयो नि भन्ने प्रश्नमा उनले भने, ‘मैले मात्र होइन, अरुले पनि पाउनु भएको छ । बागमतीमा पनि हुनुहुन्छ, लुम्बिनीमा हुनुहुन्छ ।’

प्रदेश प्रमुख परशुराम खापुङले प्रदेशसभाका नव निर्वाचित सभामुख विष्टलाई आज शपथ गराएका छन् । प्रदेश प्रमुख खापुङले प्रदेश प्रमुखको कार्यालय विराटनगरमा आयोजित एक विशेष समारोहबीच सभामुख विष्टलाई पद तथा गोपनीयताको शपथ गराएका हुन् । प्रदेशसभाबाट निर्वाचित सभामुख विष्ट प्रदेशसभाको नियमावली–२०७४ को नियम ८ बमोजिम शपथ गराइएको हो ।

शपथ समारोहमा प्रदेशका मुख्यमन्त्री केदार कार्की, निवर्तमान तथा पूर्वमुख्यमन्त्री क्रमशः हिक्मतकुमार कार्की, उद्धव थापा र राजेन्द्र राई, पूर्वसभामुख, प्रदेशका मन्त्री, प्रदेशसभाका सदस्य, सुरक्षा निकायका प्रदेश प्रमुख र विभिन्न राजनीतिक दलका कार्यकर्ताको उपस्थिति रहेको थियो ।

यसअघि आज बसेको प्रदेशसभाको बैठकमा प्रदेशसभा नियमावाली, २०७४ (पहिलो संशोधन समेत)को नियम ७ बमोजिम भएको निर्वाचनमा गठबन्धन दल र नेकपा (एमाले) को सहमतिमा सभामुख विष्ट निर्विरोध निर्वाचित भएका छन् । विष्ट राष्ट्रिय प्रजातन्त्र पार्टी (राप्रपा) बाट प्रदेशसभा सदस्य भएका हुन् ।