धरानका मेयर हर्क साम्पाङलाई १२ राजनीतिक दलको पत्र : ३ दिन भित्र खानेपानीको परीक्षण रिपोर्ट सार्वजनिक गर्न माग

धरान / धरान पिउने पानीमा कोलिफर्म भेटिएको रिपोर्ट सार्वजनिक भएपछि धरानका प्रमुख राजनीतिक दलहरूले मेयर हर्क साम्पाङको ध्यानाकर्षण गराउँदै खानेपानी बोर्डले पनि तत्काल परीक्षण गरी रिपोर्ट सार्वजनिक गर्न माग गरेका छन् ।

राजनीतिक दलका नेतृत्वहरुले मङ्गलवार संयुक्तरुपमा मेयर साम्पाङलाई ५ बुँदे माग सहितको ध्यानाकर्षण पत्र बुझाएका हुन । पानीमा कोलिफर्म भेटिएपछि जनताको स्वास्थ्यमाथि गम्भीर खेलबाड भएको टिप्पणी सहित १२ राजनीतिक दलले मङ्गलवार मेयर साम्पाङलाइ ध्यानाकर्षण पत्र बुझाएका हुन् ।

धरानमा डेंगुको महामारीसँगै जिउ चिलाउने, झाडापखाला, आँखा पाक्ने रोग पनि देखिएको र भविष्यमा महामारी हुने जोखिम भएकोले आफूहरू मूकदर्शक भएर बस्न नसक्ने भएकोले स्थानीय सरकारलाई ध्यानाकर्षण गराएको जसपा धरानका अध्यक्ष ताजुब लिम्बुले जानकारी दिए ।

राजनीतिक दलहरूले मेयर साम्पाङलाई तीन दिनभित्र पिउने पानीको परीक्षण गरेर रिपोर्ट सार्वजनिक गर्न पनि माग गरेका छन् । यस्तै, हरेक महिना पानीको परीक्षण गरेर रिपोर्ट सार्वजनिक गर्न, तत्काल ट्रिटमेन्ट गरी पिउन योग्य पानी वितरण गर्न धरान उपमहानगरपालिकातर्फबाट पनि पहल गर्नुपर्ने माग गरेका छन् ।

यस्तै, खानेपानीको मुहान संरक्षण तोकिएको मापदण्ड अनुसार गरेर मुहान क्षेत्रमा मानवीय गतिविधि बन्द गर्न र खानेपानी बोर्डको सञ्चालन प्रभावकारीरुपमा गर्न पनि दलहरूले माग गरेका छन् । पत्र बुझ्दै मेयर साम्पाङले खानेपानी बोर्डलाई पिउने पानी टेस्ट गर्न निर्देशन दिइसकेको बताए । उनले यसअघि टेस्ट गरेको भनिएपनि उक्त पानी कहाँको हो भन्ने प्रश्न उठेकोले बोर्डले आफै टेस्ट गरेर रिपोर्ट सार्वजनिक गर्ने पनि बताए । साथै, उनले पिउने पानीलाई सुद्धिकरण गर्न क्लोरिन गर्ने काम पनि भइरहेको बताए ।