धरान बजार अनुगमन गर्ने जनस्वास्थ्य निरीक्षक विजय आफै प्रक्रिया पुरा नगरी फार्मेसी सञ्चालन गर्दै

धरान / बजार अनुगमन गर्ने स्वास्थ्यका फोकल पर्सन समेत रहेका जनस्वास्थ्य निरीक्षक विजय शाहले आफै प्रक्रिया पुरा नगरी फार्मेसी सञ्चालन गरेको पाइएको छ । शाहले धरान मङ्गलबारेमा मेडिकेयर फार्मेसी नामक फार्मेसी सञ्चालन गरेको पाइएको बजार अनुगमन अधिकृत वेद सापकोटाले बताए ।

मेडिकलमा बिक्री गर्नु नपाइने हर्लिक्स, ल्याक्टोजिन बिक्री गरेको पाइएको छ भने शाहले अन्य मेडिकललाई केही दिन अनुगमनको क्रममा हर्रलिक्स ल्याक्टोजिन किराना आइटम भएको बेच्नुका लागि अनुमति लिनुपर्ने नभए बेच्न नपाउने बताएका थिए । उनकै मेडिकलमा यसरी निषेधित बस्तु बिक्री गर्दा र अरूलाई सिकाउँदै हिड्दै जनविश्वास गुम्ने प्रस्ट देखिन्छ ।

मङ्गलबारेमा ब्लुमून फार्मेसी सञ्चालिकाले अनुगमन गर्ने व्यक्ति नै खराब भएकाले सिङ्गो उपमहानगरलाई नै विश्वास गर्न नसक्ने र शाहको मेडिकलमा पाइने सरकारी औषधीका खोल लिएर धेरै बिरामी यो औषधी यहाँ पाउँछ? भन्दै आफ्नो मेडिकलमा आएको र शाहलाई उपमहानगरले गलत गर्दा नि कारबाही गर्नु नसकेको उनले बताइन्।

उपमहानगरपालिकाका सिनियर अहेव प्रती राईले अब कर्मचारीले यसरी मेडिकल चलाउन पाउने नपाउने भन्ने विषयमा उपमहानगरमा प्रशासन सँग कुरा गर्ने बताए । शाहले आफू सरकारी कर्मचारी हुनु अगाडी नै मेडिकल सञ्चालक भएको र आफू बिहान बेलुका मात्र मेडिकलमा बस्ने बताएका थिए  भने उनले अनुमति नलिईकन भित्र बिरामीलाई जाँच गर्ने स्थान समेत बनाएको पाइएको थियो । यसरी क्लिनिकको अनुमति बिना भित्र चेकजाँच गर्ने स्थान बनाउन सञ्चालन गर्न नमिल्ने सिनियर अहेब राईले बताए ।