एकै परिवारका ७ सन्तान सबै सुरक्षाकर्मी 

डोटी  / एकै परिवारका ७ सन्तान मध्ये सबैजना सुरक्षाकर्मी छन भन्दा धेरैलाई अचम्म लाग्न सक्छ । तर डोटीको केआई सिंह गाउँपालिका–६ का प्रेमराज र बासुदेवी जैशीका ७ सन्तानमध्ये सबैजना सुरक्षाकर्मी रहेका छन ।

जैशीका ५ छोरा र एक छोरीले नेपाली सेनामा सेवा गरेका छन् भने एक जना सशस्त्र प्रहरी बलमा कार्यरत छन् । नेपाली सेनामा कार्यरत मध्ये दुई जनाले अवकाश पाइसकेका छन् । जेठा टिकाराम र माइला धर्मराज ०५४ सालमा नेपाली सेनाको सैनिक पदमा भर्ना भएका थिए । टिकारामले ०७१ र धर्मराजले ०७० सालमा अवकाश लिए । साइला छोरा सहदेव भने सशस्त्र प्रहरीको मुख्यालय हलचोकमा बरिष्ठ हवल्दार पदमा कार्यरत छन् ।
‘सुरक्षा सेवामा लागेर देशका लागि काम गर्नुपर्छ भन्ने आत्मबलका कारण परिवारका सबै सदस्य सुरक्षा फौजमा लागेको सहदेब बताउँछन । ‘अहिले ५ जना कार्यरत रहेको उनको भनाई छ । ०५९ सालमा सशस्त्र प्रहरीमा छिरेका सहदेव ग्रामिण बस्तीमा हुर्किएर सुरक्षा क्षेत्रमा सबैको सहभागीता सकरात्मक रहेको बताउँछन । 

सहदेव पछिका छविलाल ०६१ सालमा नेपाली सेनामा भर्ती भएका हुन । उनका भाई भोजराज ०६८ सालमा भर्ती भए । दाजुभाईको सुरक्षा क्षेत्रको काम देखेर परिवारकी एक्ली बहिनीलाई पनि सेनाको जागिरले आकर्षित गर्यो । ‘हामीलाई देखेपछि बहिनीले पनि यहि जागिरमा जाने सोच बनाइछन’, सहदेवले भने ‘उनी पनि नेपाली सेनामा जवान पदमा छिन् ।’ सरिताकुमारी जैसी ०७२ सालमा सेनामा प्रवेश गरेकी थिइन् । परिवारका कान्छा छोरा, हरिष जैशी पनि ०७३ सालमा सेनामै प्रवेश गरेका हुन । उनी वीरेन्द्र सैनिक अस्पताल छाउनीमा कार्यरत रहेका छन । यसरी परिवारका सबैजना देश र जनताको सुरक्षामा खटिएको देख्दा उनीहरुका बुबाआमा औधी खुसी भएका छन ।