‘कोभिड–१९’ को प्रतिकार्यमा तीव्रता दिँदै कर्णाली सरकार

सुर्खेत / कर्णाली प्रदेशमा कोरोना भाइरसको रोकथाम तथा प्रतिकार्यको कामलाई थप तीव्रता दिइने भएको छ । आज कर्णाली प्रदेश सरकारका मुख्यमन्त्री महेन्द्रबहादुर शाहीको अध्यक्षतामा बसेको विषयगत मन्त्री र सचिवको संयुक्त बैठकले हालसम्म भएका कामको समीक्षा गरेको छ । त्यस्तै उक्त बैठकले आगामी दिनमा प्रतिकार्यको काम तीव्र र प्रभावकारी बनाउने निर्णय गरेको छ । बैठकमा मुख्यमन्त्री शाहीले विश्वव्यापी रुपमा देखिएको कोरोना सङ्कटको सामाधान सरकारको तात्कालीन प्राथमिकतामा रहेको बताउँदै रोकथाम तथा प्रतिकार्यको कामलाई उच्च प्राथमिकताका साथ अगाडि बढाउन निर्देशन दिनुभयो । विपद् व्यवस्थापन कार्यकारी समिति, अनुगमन समिति, आपूर्ति समिति तथा जिल्ला र स्थानीय तहका समितिहरुलाई थप सक्रिय बनाउन र कोरोना रोकथाम तथा प्रतिकार्यलाई थप प्रभावकारी बनाउन पनि उहाँले निर्देशन दिनुभयो ।

बैठकले स्वास्थ्यकर्मीका लागि आवश्यक उपकरण, औजार, सुरक्षा सामग्री र औषधिलगायत आपूर्तिका लागि सङ्घीय सरकार, निजी तथा बाह्य आपूर्तिकर्तालाई अनुरोध गर्नाका साथै सम्भावित सबै उपाय अवलम्बन गर्ने निर्णय गरेको छ । त्यसैगरी कर्णाली स्वास्थ्य विज्ञान प्रतिष्ठान जुम्लाबाट जुम्ला, कालीकोट, मुगु र हुम्ला जिल्ला, चौरजहारी सामुदायिक अस्पतालबाट रुकुमपश्चिम, जाजरकोट, डोल्पा र पूर्वी सुर्खेत जिल्लाको कार्यक्षेत्र तोकी जनशक्ति परिचालन गर्न निर्देशन गर्ने निर्णय गरिएको प्रदेश सरकारका सामाजिक विकासमन्त्री दल रावलले जानकारी दिनुभयो ।

बैठकले प्रतिकार्य योजनाका लागि आवश्यक आर्थिक व्यवस्थापन तथा परिचालनका लागि आर्थिक मामिला तथा योजना मन्त्री प्रकाश ज्वालालाई जिम्मेवारी दिने, प्रदेश राजधानी र जिल्ला र स्थानीय तहमा रहेका क्वारेन्टाइनको समन्वय सहजीकरण गर्न भूमि व्यवस्था तथा कृषि सहकारीमन्त्री विमला केसीलाई जिम्मेवारी प्रदान गर्ने, प्रदेश अस्पताल र जिल्ला अस्पतालमा शङ्कास्पद बिरामीलाई आइसोलेसनमा राख्ने, उपचार गर्ने र जनशक्ति परिचालन गर्ने कार्यको समन्वयका लागि सामाजिक विकास मन्त्री दल रावललाई जिम्मेवारी दिने निर्णय गरेको छ । यसैगरी दशवटै जिल्लामा आपूर्ति व्यवस्थालाई प्रभावकारी बनाउन उद्योग, पर्यटन, वन तथा वातावरण मन्त्री नन्दसिं बुढाको नेतृत्वमा रहेको समितिलाई थप सक्रिय बनाउने पनि बैठकले निर्णय गरेको छ । प्रतिकार्य तथा पूर्वतयारीका कार्यमा खट्ने समिति तथा युनिटको नियमित बैठक, प्रतिवेदन कार्यका लागि मुख्यमन्त्री तथा मन्त्रिपरिषद् कार्यालयका सचिवको नेतृत्वमा हेल्पडेस्क सञ्चालनमा ल्याउने र प्रतिवेदन, समन्वय तथा सञ्चारको कामलाई विद्युतीय तथा सामाजिक सञ्जालको माध्यमबाट गर्ने निर्णय सो बैठकले गरेको सूचना अधिकारी केशव उपाध्यायले जानकारी दिनुभयो ।

तपाईको प्रतिक्रिया