मोरङको रंगेलीमा पुरुष मृत भेटिए

विराटनगर / घरबाट काम गर्नका लागि भनेर निस्किएका मोरङको रंगेली नगरपालिका–३ का एक पुरुष साेमबार बिहान मृत फेला परेका छन् । घरबाट दुई दिनअघि काममा जान्छु भनेर हिँडेका ५१ वर्षीय हिमप्रसाद धिताल घरबाट लगभग एक किलोमिटर पर रहेको गडिया खोलामा मृत भेटिएका हुन् । प्रहरीका अनुसार जीविकोपार्जनका लागि ज्याला मजदुरी गर्नुपर्ने बाध्यतामा रहेका उनी शनिबार घरबाट काममा जान भनेर निस्किएका थिए ।

घर नफर्किएको र परिवारका सदस्यसँग पनि सम्पर्कविहीन बनेपछि उनको खोजी थालिएको थियो । खोला किनारमा झाडीमा अड्किएको र घोप्टो परेको अवस्थामा उनको शव फेला परेपछि स्थानीय बासिन्दाले प्रहरीलाई बिहान ८:३० बजेतिर खबर गरेका हुन् । बाढी आएको खोला तर्ने क्रममा धिताललाई खोलाले बगाएको हुनसक्ने प्रहरीको अनुमान छ ।

यद्यपि मृत्युको कारण खुल्न बाँकी छ । खोलाले बगाएर कि अरु नै कारणले मृत्यु भएको हो भन्ने बारेमा अनुसन्धानपछि मात्रै खुल्ने प्रहरीको भनाइ छ । इलाका प्रहरी कार्यालय रंगेलीका प्रहरी निरीक्षक अनमोल खड्का नेतृत्वको टोलीले शव पोस्टमार्टमका लागि रंगेली अस्पताल ल्याएर घटनाको अनुसन्धान थालेको छ ।