धरान / नेकपा विप्लव समुहको सुनसरी जिल्ला ईञ्चार्जलाई हतियारसहित धरान प्रहरीले प्रक्राउ गरेको छ । धनकुटा शहिदभुमी गाउँपालिका ६ का २७ बर्षीय रोशन राईलाई गए रातिधरान १५ बाट पक्राउ गरेको इलाका प्रहरी कार्यालय धरानले जानकारी दिएको छ ।
विशेष सुराकीको आधारमा १ नम्बर प्रदेश क्षेत्रीय अनुसन्धान समुह र इलाका प्रहरी कार्यालय धरानको संयुक्त टोलीले पक्राउ गरेको इलाका प्रहरी कार्यालय धरानका प्रमुख डिएसपी ज्ञानेन्द्रबहादुर बस्नेतले जानकारी दिएका छन् । शंका लागी सोधपुछ गर्ने क्रममा मोटरसाइकलको सिट मुनी प्लाष्टिक भित्र लुकाएको अवस्थामा हतियार र गोलीसमेत वरामद गरिएको डिएसपी बस्नेतले जानकारी दिएका छन् ।
प्रक्राउ परेका राईको साथबाट मेडइन युएसए अटोमेटिक पेस्तोल लेखेको एक थान वरामद भएको छ भने एक थान म्याग्जीन र त्यसमा लोड भएको ३ राउण्ड गोलीका साथै, २ थान मोवाइल र ६ थान सिम पनि वरामद भएको डिएसपी बस्नेतले जानकारी दिएका छन् । पक्राउ परेका राईलाई हातहतियार खरखजना मुद्दामा कारबाहीका लागि अदालतबाट म्याद थप गरी अनुसन्धान गरिने डिएसपी बस्नेतले जानकारी दिएका छन् ।
