झापामा एकै घरका तीन दाजुभाईले तीन दिदी वहिनी भित्र्याए

बिर्तामोड / भनिन्छ जन्म, मृत्यु र विवाह पूर्वजन्ममा निर्धारित हून्छ । त्यसमा पनि विवाह त देखेकाले हुँदैन लेखेकै हुनुपर्छ भन्ने मान्यता छ । तर, कस्तो संयोग ! इरौटार–८ इलाम निवासी भवनसिंह पङ्धाकका तीन भाइ छोराले धनकुटा हात्तीखर्क–१ निवासी बलबहादुर लिम्बूका तीन बहिनी छोरी नै विवाह गरेर बुहारी बनाउँदै भित्र्याए । त्यसमा पनि क्रम मिलाएर जेठा छोरालाई जेठी, माइलालाई माइली र कान्छालाई साइँली विवाह गर्दै बुहारी बनाए ।

भवनसिंहले आफ्ना जेठा छोरा धनबहादुर पङ्धाकसंग बलबहादुरकी जेठी छोरी दुर्गादेवीलाई मागेरै लिम्बू परम्परा अनुसार विवाह गरेका हुन् । उनीहरुको विवाह २०५९ सालमा भएको थियो । त्यसपछि माइला छोरा वीर्खवहादुरसंग बलबहादुरकी माइली छोरी चन्द्रमायाको र कान्छा छोरा खड्गबहादुरसँग बलबहादुरकी साइँली छोरी कुमारीसँग विवाह भएको थियो । भवनसिंहका कान्छा छोराले कुमारीसंग प्रेम विवाह गरे भने माइला छोरा वीर्खवहादुरले चन्द्रमाया लिम्बूलाई मागेरै सामाजिक परम्परा अनुसार विवाह गरेका हुन् । विवाह पछि पनि उनीहरुको परिवार अझैं संयुक्त छ ।

कसको विवाह कसरी भयो ?

२०४९ सालमा धनबहादुर पङ्धाकको विवाह दुर्गादेवीसँग भएपछि अन्य दुई भाइले समेत बलबहादुर लिम्बूकी छोरी नै भित्र्याए । त्यसमा पनि क्रम मिलाएरै । दाजुको ससुराली जाँदा सोल्टिनीसँग हासखेल गर्दागर्दै पङ्धाकका कान्छा भाइ खड्गबहादुरले कुमारीसँग २०६२ सालमा प्रेम विवाह गरे । त्यसपछि परिवारकै सल्लाहमा उनका माइला भाइ बीर्खबहादुरले ससुरा बलबहादुरसँग साली चन्द्रमाया लिम्बूको हात माग्दै सामाजिक परम्परा अनुसार २०६४ सालमा विवाह गरे ।

पन्धाक परिवारमा आफ्ना छोरी रिझाएर बसेको देखेपछि बलबहादुरले समेत पङ्धाक परिवारबाटै बुहारी भित्र्याए । आफ्नो एक मात्र छोरा तोपबहादुर लिम्बूलाई धनवहादुरकी काका तुकवहादुर पङ्धाककी छोरी चन्द्रा लिम्बूसँग विवाह गर्दै सम्बन्धलाई अझ बलियो र दोहोरो बनाए । दोहोरो सम्बन्धका कारण पङ्धाक परिवार र लिम्बू परिवार अहिले एक ढिक्का छन् । उनीहरुको परिवारमा न कलह छ, न त झैं–झगडा नै । बलबहादुरका छ छोरीमध्ये तीन छोरी पङ्धाक परिवारलाई नै वुहारी बनाएर भित्र्याएपछि समुरालीपनि आफूहरुसंग खुशी रहेको पङ्धाकले बताए ।

को हुन् धनबहादुर

वैदेशिक रोजगार व्यवसायी प्रतिनिधि एजेन्ट संघ झापा शाखाका अध्यक्ष हुन् उनी । २०६० सालबाट मेनपावर व्यवसाय सञ्चालन गर्दै आएका उनले अहिले सो संघको नेतृत्व गरिरहेका छन् । धनकुटा वहुमुखी क्याम्पसबाट अंग्रेजी विषयमा स्नातकसम्मको अध्ययन गरेका उनी भवनसिंह र स्व. सुकमती लिम्बूका जेठा छोरा हुन् । २०५९ सालबाट ग्वालडुव्वा माविमा उनले शिक्षकको रुपमा सेवा समेत गरे । विद्यार्थी जीवनबाटै राजनीतिमा चासो राख्ने भएकाले उनले त्यहाँ चार वर्षसम्ममात्र शिक्षण पेशामा आवद्ध भए ।

२०३६ साल माघ २४ गते जन्मिएका पङ्धाकले विद्यार्थी जीवनमै डा. गोपाल गुरुङले लेखेको पुस्तक ‘राजनीतिमा अदेखा सोचाई’ पढेपछि उनी राजनीतिमा अझ नजिकिए । सोही क्रममा उनले मंगोल नेशनल अर्गनाइजेशनको विद्यार्थी संगठनमा अध्यक्षको भूमिका निर्वाह गर्दै राजनीतिक यात्रा प्रारम्भ गरे । पछि २०६२÷०६३को जनआन्दोलनका क्रममा संघीय लिम्बुवान राज्य परिषद्को सदस्य हुँदै उनी अहिले सोही पार्टी संघीय लिम्वुवान मञ्च नेपालको जिल्ला अध्यक्ष छन् । उनले २०७० सालबाट सो पार्टीको नेतृत्व गरिरहेका छन् ।

२०६० सालबाट मेनपावर व्यवसाय शुरु गरेका उनले हाल ट्रष्ट नेपाल सञ्चालन गरिरहेका छन् । शुरुमा उनले वीएम ओभरसिज, पङ्धाक ओभरसिज, वेव मेनपावर सञ्चालन गरे । उनले सञ्चालन गरेको वीएम र वेव मेनपावर बन्द छ भने पङ्धाक र ट्रष्ट नेपाल उनी अझै सञ्चालन गरिरहेका छन् । १० हजार रुपैयाँ लगानी गरेर मेनपावर व्यवसाय शुरु गरेका उनले अन्ततः सरकारी जागिर छाडेर मेनपावरलाई नै रोजे ।

चलचित्र पनि बनाए पङ्धाकले

नेपाली राजनीतिको परिदृश्यलाई एकीकृत गर्दै उनले नेपाली कथानक चलचित्र ‘म हँु राष्ट्रको भूमिपुत्र’ नामक चलचित्र निर्माण गरे । उनले लिम्बुवान आन्दोलनका क्रममा देखिएको घटनाक्रमलाई समेट्दै मायाप्रेममा आधारित देशभक्ति चलचित्र निर्माण गरे । सो चलचित्र उनले २०७२ सालमा तयार पार्दै रिलिज समेत गरे । सो चलचित्रमा उनले क्याम्पस प्रमुखको भूमिका समेत निर्वाह गरेका छन् ।

श्रीमती पनि मेनपावर व्यवसायी

मेनपावर व्यवसायमा पङ्धाक मात्र होइन उनकी श्रीमती दुर्गा पनि संलग्न छिन् । उनले पनि खाँदै गरेको जागिर छाडेर मेनपावर व्यवसाय शुरु गरेकी हुन् । शान्ति निकेतन आवासीय विद्यालयमा २०६१ सालवाट शिक्षक पदमा नियुक्त भई उनले चार वर्षसम्म काम गरिन् । अन्ततः उनले पनि शिक्षकको जागिर छाड्दै श्रीमानकै पेशा रोजिन् र मेनपावर व्यवसायमा आवद्ध भइन् ।

बिर्तामोडलाई स्थायी बसोबास बनाएको पङ्धाक परिवार मेनपावर व्यवसायमा आवद्धता जनाएसँगै दुर्गाले पनि प्रयास रि–इम्प्लोइमेन्ट कन्स्लटेन्सी प्रालि सञ्चालन गरिन् । उनले अहिले पनि सोही मेनपावर सञ्चालन गरिरहेकी छिन् । २०३८ साल भदौ २९ गते जन्मिएकी दुर्गादेवी अहिले पङ्धाकसँगै प्रतिस्पर्धामा मेनपावर व्यवसाय सञ्चालन गरिरहेकी छिन् । उनी जिल्लाकै राम्रो मेनपावर व्यवसायीका रुपमा परिचित छिन् । उनीहरुका दुई छोराछोरी छन् । पङ्धाकका जेठो छोरा ऋजन १५ वर्षका छन् भने छोरी खुशी ८ वर्षकी छिन् ।

को हुन् बीर्खबहादुर ?

बीर्खबहादुर पनि मेनपावर व्यवसायी नै हुन् । उनी भवनसिंहका माइँला छोरा हुन् । २०३८ साल भदौ २९ गते जन्मिएका उनले शुरुमा शिक्षण पेशामा समेत आबद्धता जनाए । तर, शिक्षण पेशाबाट सन्तुष्ट नभएपछि उनले मदरल्याण्ड ओभरसिज सञ्चालन गरे । मेनपावर व्यवसाय उनले झण्डै दश वर्षसम्म सञ्चालन गरे । सोही क्रममा मलेसियाबाट राम्रो कामको अवसर आएपछि उनी मेनपावर व्यवसाय छाडेर वैदेशिक रोजगारीका लागि मलेसिया गए । एक वर्षअघि मलेसिया पुगेका बीर्खबहादुरकी श्रीमती चन्द्रमाया गृहिणी हुन् भने उनीहरुका एक सन्तान रहेका छन् ।

को हुन् खड्गबहादुर ?

भवनसिंहका कान्छा छोरा खड्गबहादुर अहिले नेपाल विद्यार्थी संघका केन्द्रीय सदस्य हुन् । बानेश्वर क्याम्पसमा पढ्दापढ्दै नेविसंघमा आबद्ध भएका उनी अहिले नेविसंघका केन्द्रीय सदस्य छन् । धनकुटा हात्तीखर्क–१ निवासी बलबहादुर र धनमाया लिम्बूकी साहिली छोरी कुमारी लिम्बूसँग विवाह गरेका उनका हाल दुई सन्तान छन् । २०४२ साल भदौ १० गते जन्मिएका खड्गबहादुर स्नातकोत्तर गरिरहेका छन् । उनी हाल काठमाडौं बसेर विद्यार्थी संगठनको राजनीतिसँगै अध्ययन गरिरहेका छन् । उनकी श्रीमती कुमारी गृहिणी छन् ।

Purbeli TV

खोज र समसामयिक बिषयमा कलम चलाउनुहुने भण्डारी पूर्वेली न्युजका झापा सहकर्मी हुनुहुन्छ ।

सुरेन्द्र भण्डारीबाट थप

अर्काको नाममा ट्रायल दिने पक्राऊ

थाङ फाउण्डेशन नेदरलेण्डद्वारा झापाका २१ विद्यालयलाई सहयोग

पशुपति माविमा आर्थिक अनियमितता, हिसाब मिलाउन प्रअलाई भ्याइनभ्याई

जिममा महिला क्रेज

झापामा एकै घरका तीन दाजुभाईले तीन दिदी वहिनी भित्र्याए

दुर्घटना न्यूनीकरणका लागि ट्राफिककाे नयाँ अभियान : पूर्वका सडकमा चल्यो राडरगन

गाउँपालिका अध्यक्षले विद्यालयको शौचालय सफा गर्न थालेपछि जिल्लाभर चर्चा

इलाममा ८३ वर्षीया वृद्धाको बलात्कारपछि काटियो जिव्रो , उपचारमा समस्या

शहीद परिवार सरकारी सेवाबाट बञ्चित

झापा सुन व्यवसायी साजनको हत्यामा सम्लग्न थप दुई पक्राउ

तपाईको प्रतिक्रिया