राजधानी माग्दै जनप्रतिनिधिद्वारा सडक मै धर्ना

भक्तपुर, ५ माघ / सरकारले ३ नम्बर प्रदेशको अस्थायी राजधानी मकवानपुरको हेटौँडालाई तोकेपछि भक्तपुरमा यसको विरोध गर्दै आन्दोलन शुरु भएको छ ।
जिल्ला समन्वय समिति भक्तपुर र मध्यपुरथिमि नगरपालिकाको नेतृत्वमा प्रदेश राजधानी भक्तपुर हुनुपर्ने माग गर्दै आन्दोलन शुरु भएको हो । आन्दोलनको पहिलो दिन बिहीबार सानोठिमी चोकमा मध्यपुरथिमि नगरपालिकाका प्रमुख मदनसुन्दर श्रेष्ठको नेतृत्वमा मध्यपुरथिमि, चाँगुनारायण र सूर्यविनायक नगरपालिकाका जनप्रतिनिधि, विभिन्न राजनीतिक दलका प्रतिनिधि, कर्मचारी, बुद्धिजीवी र स्थानीय बासिन्दाले सडक मै धर्ना दिई प्रदर्शन गरेर सडक बन्द गराएका छन् ।

कार्यक्रममा विरोधपछि भएको कोणसभामा बोल्दै प्रतिनिधिसभा सदस्य एवं पूर्वमन्त्री महेश बस्नेतले सरकारले खटाएको प्राविधिक टोली, जिल्ला समन्वय समिति र दलीय प्रतिनिधिको सुझावलाई लत्याउँदै सरकारले गरेको निर्णय तत्काल सच्याएर भक्तपुरलाई प्रदेश राजधानी घोषणा गर्न माग गर्नुभयो ।

भक्तपुरलाई अस्थायी राजधानी बनाउन ३ नं प्रदेशका १२ जिल्लाको समर्थन रहेको दाबी गर्दै बस्नेतले भन्नुभयो, “सरकारले अदूरदर्शी निर्णय गरेको छ, बिहीबार दिउँसोसम्म भक्तपुरलाई नै ३ नं प्रदेश बनाउने तयारी गरे पनि साँझ एकलौटी निर्णय गरी हेटौँडालाई प्रदेशको अस्थायी राजधानी तोकियो । यो निर्णय सच्याएर भक्तपुरलाई नै प्रदेश राजधानी बनाउन माग गर्छौं, अन्यथा आन्दोलनलाई चर्काउँछौँ ।”

धर्नामा बोल्दै प्रदेश सदस्य शशीजंग थापाले हेटाँैडा सिफारिस मै नपरेको र अन्य जिल्लालाई समेत पायक नपर्ने दाबी गर्दै भन्नुभयो– “प्राविधिक टोलीले समेत भक्तपुर उपयुक्त भनेको, सबै जिल्लालाई पायक पर्ने क्षेत्र पनि भक्तपुर र सरकारले प्रदेश राजधानीका लागि पूर्वाधार निर्माणमा लगानीसमेत गर्नु नपर्ने भएकाले एक मात्रै विकल्प भक्तपुर भएकाले निर्णय सच्याउन माग गर्दछौँ ।”

कार्यक्रममा मध्यपुरथिमि नगरपालिकाका प्रमुख मदनसुन्दर श्रेष्ठले भक्तपुरको सानोठिमीलाई प्रदेश राजधानी नतोकी हेटाँैडा तोकिएकोमा आन्दोलनको शुरु गरेको बताउँदै भन्नुभयो– “सानोठिमीलाई प्रदेश राजधानी बनाउन नगरपालिकाले आन्दोलनको नेतृत्व लिएको छ, माग पूरा नभएसम्म आन्दोलन जारी रहन्छ ।” नगरपालिकाले आज पनि मध्यपुरथिमिको बहाखा बजारमा सडकमा धर्ना, प्रदर्शन र सडक बन्द गरी विरोध गर्ने भएको नगर प्रमुख श्रेष्ठले जानकारी दिनुभयो ।

यसअघि बिहीबार जिल्ला समन्वय समिति, भक्तपुरले आयोजना गरेको बृहत् छलफलबाट ३ नं प्रदेश राजधानी हेटाँैडा तोक्ने सरकारको निर्णय सच्याउन माग गरेको थियो । जिससमा भक्तपुरको छलफलमा प्रतिनिधिसभा सदस्य, प्रदेशसभा सदस्य, समानुपातिक सदस्य, दलीय प्रतिनिधि, बुद्धिजीवी, पत्रकार र बुद्धिजीवीसहित सरोकारवालाको छलफलले आन्दोलन गर्ने घोषणा गर्दै सरकारलाई तत्काल निर्णय सच्याउन माग गरेको जिल्ला समन्वय समिति, भक्तपुरका प्रमुख नवराज गेलालले बताउनुभयो ।

भक्तपुरले प्रदेश राजधानी माग्दै आन्दोलन शुरु गरिसकेकाले प्रधानमन्त्री, विभिन्न पार्टीका अध्यक्षलाई ज्ञापनपत्र बुझाउने, प्रतिनिधि तथा प्रदेश सदस्यसँग छलफल गर्ने र थप आन्दोलनका कार्यक्रम घोषणा गरिने बताउनुभयो ।

एमाले, काँग्रेस र माओवादी केन्द्रको एउटै माग

एमाले भक्तपुर जिल्ला अध्यक्ष राजेन्द्र राजथला र नेकपा (माओवादी केन्द्र) भक्तपुरका संयोजक डिपी ढकालले सरकारले निर्णय सच्याएर भक्तपुरलाई ३ नं प्रदेशको राजधानी नबनाए कडा आन्दोलन गर्न बाध्य हुने बताउनुभयो ।

यता नेपाली काँग्रेसका जिल्ला सभापति दुर्लभ थापाले सरकारको निर्णयलाई सच्याउन माग गर्दै हेटाँैडा ३ नं प्रदेश राजधानी मान्य नभएको बताउँदै सबै जिल्लालाई पायक पर्ने भक्तपुर मात्रै एक जिल्ला रहेकाले भक्तपुरलाई नै प्रदेश राजधानी तोक्न माग गर्नुभयो ।

प्रदेश सांसद राजेन्द्रमान श्रेष्ठ, हरिशरण लामिछाने, सरस्वती वाटी, रजनी जोन्छे, पूर्व सांसद केदार सञ्जेलले सरकारले खटाएको प्राविधिक टोलीले नै सानोठिमी उपयुक्त भएको प्रतिवेदन दिएकाले प्रदेश राजधानीका लागि शान्तिपूर्ण आन्दोलन गर्नुपर्ने बताउनुभयो ।

तपाईको प्रतिक्रिया