सुनसरीमा १०२ संक्रमित, निको हुनेको संख्या ८८ पुग्याे

इनरुवा / सुनसरीमा निको हुने कोरोना संक्रमितको संख्या ८८ पुगेको छ । जिल्लामा स्वाब संकलन गरिएका मध्येबाट पोजेटिभ भेटिएका संक्रमित १ सय २ जना मध्ये ८८ जना निको भएर घर फर्किएका छन् । स्वास्थ्य कार्यालय सुनसरीका अनुसार पछिल्लो अवस्था सम्ममा बाहिरी जिल्लामा स्वाब संकलन गरिएको ३ जना समेत सुनसरीका १ सय ५ जना संक्रमित भेटिएका छन् ।

सुनसरीमा अब कोरोना पोजेटिभ भेटिएका मध्ये धरान, इटहरी, रामधुनी र बर्जुका गरी १४ जना मात्र उपचारको क्रममा छन् । स्वास्थ्य कार्यालय सुनसरीका अनुसार उनीहरु सबैको अवस्था सामान्य छ । सुनसरीमा सबैभन्दा बढी भोक्राहामा १९ जना संक्रमित भेटिएका थिए । सबैभन्दा कम दुहबी नगरपालिकामा १ जना कोरोना पोजेटिभ पाइएका हुन् ।

स्वास्थ्य कार्यालयले सार्वजनिक गरेको तथ्याङक अनुसार जिल्लामा सबैभन्दा बढी २१ देखि ३० वर्ष उमेर समूहका व्यक्तिमा कोरोना पोजेटिभ भेटिएको छ । त्यसपछि दोस्रो नम्बरमा ११ देखि २० वर्ष उमेर समूह रहेको छ । ६१ वर्ष भन्दा माथि कोरोना संक्रमित भेटिएको संख्या २ मात्र छ ।

सुनसरीमा अहिले सम्म ५ हजार १ सय ८४ जनाको पिसिआर परिक्षण गरिएको छ । जसमध्ये १ सय २ जना पोजेटिभ भेटिएका छन् । संक्रमित मध्ये पुरुष ८४ जना रहेका छन् भने महिलाको संख्या १८ छ । सुनसरीमा २ हजार १ सय ७८ जनाको आरडिटी टेस्ट भएको कार्यालयले जनाएको छ । पछिल्लो अवस्था सम्ममा १ सय ४ जना संक्रमितको आधारमा जिल्ला भित्र र बाहिरको गरी ५ सय २० जनाको कन्ट्याक ट्रेसिङ भएको छ । स्वास्थ्य कार्यालय सुनसरीले जिल्ला समिक्षा कार्यक्रमको आयोजना गरी सो विवरण सार्वजनिक गरेको हो ।

स्वास्थ्य कार्यालय सुनसरीका प्रमुख सागर प्रसाईका अनुसार सुनसरीमा स्वाब संकलनका क्रममा कोरोना भाइरस संक्रमित पाइएकाहरु भारत लगायतका मुलुकबाट घर फर्किएका व्यक्तिहरु हुन् । उनीहरु सबै क्वारेन्टिनमा रहेकाहरु हुन् । स्वास्थ्य प्रमुख प्रसाईका अनुसार सुनसरीमा कोरोना समुदायमा भेटिएको छैन् । त्यसैले आत्तिनु पर्ने अवस्था छैन् । यद्यपी स्वयं सचेत र सजक रहन भने आवश्यक छ ।

तपाईको प्रतिक्रिया

Loading…