विप्लव समूह आतंककारी : प्रधानमन्त्री ओली

विराटनगर / प्रधानमन्त्री केपी शर्मा ओलीले नेत्रविक्रम चन्द ‘विप्लव’ नेत्रृत्वको समूह एकपछि अर्को आतंककारी गतिविधीतर्फ उन्मुख हुँदै गएका कारण सरकार कठोर बन्नु परेको बताए । आफूलाई आफैले राजनैतिक दलको संज्ञा दिएर विप्लव समूह विभिन्न विध्वंसात्मक र आतंककारी गतिविधीमा लागेको उनको आरोप छ । विराटनगर विमानस्थलमा आइतबार संचारकर्मीसँग कुरा गर्दै ओलीले ‘विप्लव’ नेत्रृत्वको नेकपा कुनै दल विशेष र आधिकारिक नभइकन अनाधिकृत झुण्ड भएको बताए । उनले काहीं पनि दर्ता नभएका कारण यसलाई दल मान्न नसकिने र आधिकारिक रुपमा लिन नसकिने उनको तर्क छ ।

‘यो काहीं पनि दर्ता भएर आधिकारिक भएको छैन । त्यही पनि राजनैतिक दल हुँ भन्दै विभिन्न विध्वंस मच्चाउने काम गरिरहेको छ,’ उनले भने, ‘दल भएको भए आधिकारिक रुपमा दर्ता भएर जनताको सेवामा लाग्नु पर्छ । विध्वंस र आतंक मच्चाएर जनविरोधी गतिविधीलाई निरन्तरता दिएकै कारण उ माथि सरकारले प्रतिबन्ध लगाउने कठोर निर्णय लिनु पर्ने अवस्था आयो ।’ जनविरोधी गतिविधी गर्दै ठाउँ ठाउँमा बम पड्काएर जनतामा मार्दै हिंड्नेलाई आतंककारी भन्दा केही फरक नपर्ने ओलीको तर्क छ ।

उनले बम पड्काएर उद्यमी, व्यवसायी, जनप्रतिनिधि र जनतालाई धम्क्याउने एवं तर्साउने कार्य सरकारलाई मान्य नहुने स्पष्ट पारे । ‘बम पड्काएर आतंक सिर्जना गर्दै धम्क्याउने र तर्साउने काम भइरहेको छ,’ उनले भने, ‘अनि यस्तो गर्न पाइँदैन भनेर सरकारले प्रतिबन्ध लगाउँदा के को रुवाबासी ?’ विप्लव समूहका बारेमा धारणा राख्दा सचेत हुन नेताहरुलाई प्रधानमन्त्रीले आग्रह पनि गरे । ‘आफैलाई जवाफ दिन नसक्ने हिसावमा विप्लवका बारेमा कुरा नगर्न म सबै नेताजीहरुलाई आग्रह गर्छु,’ ओलीले भने, ‘दलका रुपमा कहीं दर्ता नभएको यो समूह कहिले कोब्रा समूह भनेर चिनिने र कहिले के भनेर चिनिने जस्तै हो ।’

ओलीले विप्लवलाई जनभावना अनुसार अघि बढेर राजनैतिक गतिविधी सञ्चालन गर्न र जनताको सेवामा लागेर जनताको मन जित्न पनि आग्रह गरे । प्रधानमन्त्री ओलीले संविधान विपरीत, कानुन विपरीत, लुटपाट र आतंकका गतिविधि गर्न नपाइने र यस्ता गतिविधिमा सधैं सरकार कठोर बन्ने स्पष्ट पारे । सरकारले समिति नै बनाएर वार्तामा बोलाउँदा पनि नआएपछि विप्लवमाथि कठोर निर्णय लिनु परेको उनको भनाइ छ । ओलीले सधैं अशान्ति मच्चाउने छुट कसैलाई पनि नभएको बताए । उनले विप्लवले उठाएका मुद्धा र राखेका माग सभ्य समाजले सुन्न सक्ने खालको नभएको टिप्पणी गरे ।

एक अर्को प्रशंगमा ओलीले तत्काल मन्त्रीपरिषद् पुर्नगठन नहुने जानकारी दिए । ‘खाली भएको मन्त्रालयलाई पूर्ण बनाउने हो,’ उनले भने, ‘एउटा मन्त्रालय खाली भएकाले त्यहाँ चैं पूर्ण बनाउने हो ।’ उनले अहिले तत्काल मन्त्रीपरिषद् पुर्नगठनका विषयमा सरकारको कुनै योजना नरहेको बताए । ओलीले पृथकतावादी सोंच बोकेका सीके राउतलाई सहमतिमा ल्याउन सक्नु सरकारको ठूलो उपलब्धी भएको बताए । ‘मुलुक नै टुक्राउनु पर्छ भन्ने पृथकतावादी सोंच त्यागेर उहाँ मूलधारमा आउनु भएको छ,’ उनले भने, ‘यसमा सरकारले सकारात्मक भूमिका खेल्न सक्यो ।’ ओलीले राम्रा कामको प्रसम्शा र नराम्रा कामको आलोचना गर्ने बानीको विकास सबैमा हुनु पर्नेमा जोड दिए ।

Purbeli TV

तपाईको प्रतिक्रिया